في بعض الأحيان ممكن نكون مضطرين نتابع أعمال التشطيبات الداخلية لشقتنا بنفسنا لاسباب كتيره منها عدم القدره علي تحمل تكاليف شركه تشطيب قويه او الاستعانه بمهندس حر يقوم بالاشراف لتقليل النفاقات . ودا هايكلفنا عناء التعامل مع الصنايعية  وعلشان كده احنا في سلسلة من المقالات هانقدم نصايح التشطيبات الداخليه لكل واحد هايخوض التجربة دي بنفسه . نبدأها دلوقتي بأول واهم نصيحة انك تكون عارف وفاهم كويس ايه هو الترتيب الطبيعي للتشطيبات الداخليه لأن الترتيب الصحيح لوحده مسئول عن جزء كبير من جودة ووقت وتكلفة الشغل .

خطوات التشطيبات الداخليه

1- الأفضل قدر المستطاع انك تستلم شقتك علي الطوب بعد خصم تكاليف المحارة ودا لعده اسباب ( بلاش المحاره التجاري )

أ- جميع الشركات والمطورين العقاريين او المقاولين في مرحله التشطيبات الداخليه بيهمهم في المقام الاول السعر الرخيص للفني لزياده الربح مما يترتب عليه مشاكل كثيره جدا في الفنش
ب- المواصفات الفنيه في المحاره التجاري لا تخضع للكود المصري في نسب الخلط بين الاسمنت والرمل  وفي مراحل استلام الاعمال و المراحل
ج- رقابه وكنترول ضعيف جدا علي الفني اثناء الشغل مما يؤدي هذا الي زياده الاخطاء

اعمل المحاره بنفسك هتضمن جوده عاليه .وهتتفق مع فني قوي وبمواصفات فنيه محترمه ووفقا للكود المصري وكمان هايوفر عليك  اي تعديلات في المحاره وهيوفر في خامات النقاشه

2- تتعاقد مع اي مهندس او شركه تشطيبات داخليه  ذو خبره لعمل تصميم داخلي علي اسس سليمه ووفقا لاحتياجاتك ومتطلباتك  و ( خد وقتك في المرحله دي  ) وبعد ما توافق علي التصميم  يقوم المهندس او شركه التشطيبات الداخليه بعمل الروسمات التنفيذيه لهذا التصميم بكل تفاصيلها وهيسلمك لوحات ( الفرش – كهرباء باور واناره – سباكه صرف وتغذيه – تقسيط ارضيات – السقف – تعديلات معماريه – افراد حوائط للديكور )

وبكدا انت بتضمن انك لو جبت اي فني انه مش هيفتي من دماغه لانه عنده لوحات هندسيه وتصميم هيمشي عليه وعنده كل الداتا المطلوبه

3- مراجعة التقسيمات الداخليه و التعديلات المعمارية بناء علي التصميم المعتمد قبل بداية الشغل علشان تتأكد انك فاهم وموافق علي المساحات الموجودة

4- أعمال التكسير لتمديدات السباكه و الصحي والكهربا وطبعا ناخد بالنا من أعمال التكييف المرتبطة بيهم .

5- اعمال المحاره ودي طبعا اللي هاتحددلك بشكل كبير مستوي التشطيبات الداخليه بتاعتك واهمها الدهانات .( ارجوك اهتم بيها واصرف عليها واختار فني قوي )

6- أعمال الجيبسمبورد للريسبشن والغرف فقط وليس الحمامات ( الحمامات هنعملها بعد الانتهاء من السيراميك )

7- تركيبات سيراميك الأرضيات وحوائط الحمامات

8- تأسيس الدهانات من مراشمه وسيلر ومعجون والصنفره وبطانه ( وهنقف )

9- تركيب الابواب والبرور وتركيب شبابيك الالومنيوم والباب المصفح ان وجد

10- تركيب المفاتيح والبرايز في  الكهرباء والاسبوتات في السقف والليد ( عشان نعرف نفنش دهانات علي اضاءه الفراغ الحقيقه )

11-تلقيطه لمعالجه العيوب و تشطيب الدهانات و الديكور .

12- تركيب المرايات والسيكوريت وفنش السباكه

في النهايه نقولك لو في قدره ماديه علي الاستعانه ب شركه تشطيبات داخليه محترفه بكدا انك بتضمن جوده ممتازه وراحه بال وتحافظ علي فلوسك